Urnietako Udala Gipuzkoako Foru Aldundiko Mugikortasun Sailarekin harremanetan dago Buruntzaldeko autobusen zerbitzu publikoan egindako aldaketen inguruan.

Uztailean, lizitazio berria indarrean sartu eta hasierako arazoak sortu ondoren, Aldundiko Mugikortasun Sailak bilera batera deitu zituen Buruntzaldeko lineak zerbitzua ematen dien udaletako ordezkariak. Bilera hartan, Udal ordezkariek zerbitzu berriak eragiten zituen kexak eta demandak zerrendatu zituzten, eta Aldundiak irailerako aldaketak egingo zirela jakinarazi zuen.

Irailaren hasieran hainbat aldaketa egin ziren, baina egiaztatu ahal izan denez, oraindik ez dira erabiltzaileen beharrak konpondu. Joan den astean, Urnietako Udala harremanetan jarri zen Mugikortasun Sailarekin, jasotako kexak berriro helarazteko eta Aldundiarekin akordio batera iristen saiatzeko.

Kexarik ugarienak autobusen ordutegi aldaketari buruzkoak izan dira, izan ere, horrek, kasu askotan, zaildu egiten du erabiltzaileak beren helmugetara garaiz iristea eta aurreko autobusa hartzera behartzen ditu. Errekaldeko geltokia kentzeak ere erreklamazio asko sortzen ditu, izan ere, orain, aurreko edo ondorengo geltokitik joan behar da Euskotrenekin lotura egin ahal izateko.

Udala harremanetan dago Gipuzkoako Foru Aldundiko Mugikortasun Sailarekin, zerbitzu berriaren eraginak ahalik eta txikienak izan daitezen, eta espero du laster erabiltzaileak ahalik eta gehien asebeteko dituen irtenbide batera iristea.