Apirilaren 3an Realak Errege Kopako final historikoa jokatuko du Sevillan Athleticen aurka.

Covid 19ak baldintzatutako egungo egoerak ezinezko egiten du zale gipuzkoarren presentzia Sevillan. Hori dela eta, Realak "Gurekin" kanpaina prestatu du, Gipuzkoa osoa Realarekin egoteko finalaren egunean.

Kanpaina honekin, Gipuzkoako udalerri guztietako banderak eramango dituzte Sevillara eta, jakina, Urnietak bat egin du ekimenarekin.

Urnietako bandera jasotzeko Realaren autobus ofiziala herrira hurbildu da gaur goizean, eta bertan egin dute bandera trukea. Ekitaldian parte hartu dute besteak beste, Jorge Segurado Urnietako alkateak, udaleko ordezkariek, Joseba Ibarburu Realeko presidenteordeak eta Mikel Loinaz eta Aitor Lopez Rekarte txuri-urdinen jokalari ohiek.