Urnietako alkateak ostegunetik ostiralerako gauean Eteneta eta San Juan lotzen dituen igogailuan egindako ekintza bandalikoak salatu ditu, izan ere, horren ondorioz, igogailua oso kaltetuta dago.

Alkateak onartezintzat eta ulertezintzat jo ditu ekintza horiek, eta jakinarazi du behar dena egingo dela gertakari horiek berriro gerta ez daitezen. Udaltzaingoa kasua ikertzen ari da eta beharrezko neurriak hartuko dira.

Udalerriko pertsona askori zerbitzua ematen dien igogailua da, eta horietako batzuentzat ezinbestekoa da herriaren alde batetik bestera mugitu ahal izateko. Ez da ulertzen nola gerta daitezkeen herritarren eskura jartzen diren zerbitzuei kalte besterik egiten ez dieten horrelako ekintzak.

Era berean, errespetuaren eta jokabide zuzenen aldeko aldarri egin du, eta horrelako jokabideak berriro ez errepikatzea espero du.