Euskararen erabilera gizarteko alor guztietan sustatzeko lanean dihardu Urnietako Udalak, baita autoeskolen eremuan ere. Helburu horrekin, Gidabaimena Euskaraz programa garatzen du Buruntzaldeko gainerako udalerriekin batera, gidabaimena ateratzeko asmoa duten herritarrek, azterketaren atal teorikoa euskaraz ikasteko eta azterketa euskaraz egiteko saiakera egin dezaten. 

Pizgarri moduan, azterketa euskaraz gainditzen duten Buruntzaldeko pertsonen artean, 400 euroko sariak zozkatzen dira urtero, udalerri bakoitzean dagoen autoeskola kopurua erreferentziatzat hartuta. Beraz, Urnietan bat. Dena den, zozketan sartzen dira azterketa gainditu duten urnietar guztiak, nahiz eta Urnietako autoeskola batean matrikulatuta ez egon. 

Eta hain zuzen, hori izan da aurtengo kasua. 2024an azterketa euskaraz gainditu zuten eta aurkeztu ziren 6 herritarren artean, Hernaniko Otamendi autoeskolako ikasle izandako Olatz Urruzola Labakak irabazi baitu zozketa, eta hortaz, bera izan da pertsona saritua. Zozketa maiatzaren 16an burutu zen Hernanin Udal ordezkarien presentziarekin.