Urnieta garatzen eta hobetzen jarraitzeko ezinbestekoa da herritarren iritziak kontuan hartzea. Baita, gure gazteen ikuspuntua ezagutzea, euren eskuetan egongo baita etorkizuna.

Helburu horrekin, aurrekontu irekien parte hartze prozesuaren barruan, Magaleko eta Egapeko LH-6ko ikasleekin lanketa bereziak egiteko dinamika hartu du Urnietako Udalak. Izan ere, prozesu orokorrean 16 urtetik gorako urnietarrek soilik dute ekarpenak egiteko aukera. Udalarentzat ordea, funtsezkoa da, gazteak ere entzutea eta haien ikuspuntua ezagutzea.

Helburu horrekin saio bereziak gauzatu dira herriko bi ikastetxeetan Jorge Segurado alkatearen eta Agurtzane Mercader zinegotziaren eskutik. Oso saio emankorrak izan dira, ikasleen partaidetza, inplikazio eta jakin-min handiarekin kontatu baitute. Egapeko hitzordua azaroaren 8an izan zen eta Magalekoa ostera, azaroaren 20an.

Orain, ikasleak Udalari helaraziko dizkioten proposamenak lantzen ari dira. Ondoren, hirigintzako teknikariek proposamen horiek aztertu eta lehenetsi egingo dituzte 2025.urtean gauzatzeko. 15.000 euro bideratuko dira ikasleek aurkezturiko hobekuntzak aurrera eramateko.