Urnietako Udalak bi parte hartze prozesu jarri ditu abian aurten ere herritarrak entzun nahi dituelako. Bat, herriko zein plaza edo parke estaliko den erabakitzeko, eta bestea berriz, hurrengo urteko aurrekontuko 150.000 euro zertan gastatu zehazteko.

Bi prozesu horien gaineko aurkezpenak egin ostean, eta informazio liburuxkak etxeetara banatu eta gero, informazio karpak jarriko dira bi egunetan herritarren ekarpenak jasotzeko eta dituzten zalantzak argitzen laguntzeko.

• Maiatzaren 14an: 10:00etatik 14:30era Etxeberri plazan eta 17:00etatik 20:00etara Guria tabernaren inguruan.
• Maiatzaren 15ean: 10:00etatik 14:30era San Joan plazan.

Photocall

Maiatzaren 14an photocall bat egongo da informazio karpan. Bertan parte hartzen duten pertsonei argazki bat aterako zaie eta argazki hori eramango duen oroigarri bat oparituko zaie.

Halaber, formularioak herriko puntu desberdinetan jarritako kutxa eta buzoietan entregatu daitezke, eta baita, webgunean eta APP-an bete ere maiatzaren 23 arte. Urnietan erroldaturiko 16 urtetik gorako edonork har dezake parte.