Urnietako Udalak herritarrak entzuten jarraitu nahi du eta parte hartze prozesu berri bat martxan ipini du 2024ko aurrekontuko 150.000 euro zertara bideratu erabakitzeko. Horrela, herritarrek beraien auzo eta kaleetan hobetzeko, konpontzeko edo egiteko ikusten dituzten gauzak aintzat hartuta proposamenak egiteko aukera dute.

Prozesu honek bi fase izango ditu

1. Herritarrek proposamenak aurkeztuko dituzte.
2. Udaleko teknikariek jasotako proposamenen bideragarritasun teknikoa eta ekonomikoa aztertuko dute eta lehenetsi egingo dituzte 2024.urtean gauzatzeko.

 Nolako proposamenak aurkez daitezke?

1. Udal-eskumenekoak diren proposamenak, jarduera-arlo hauei lotuta: obrak, hirigintza eta mantentze-lanak.
2. Ekonomia edo/eta teknika aldetik bideragarriak diren proposamenak. Gauzatzeko 50.000€ (BEZa barne) baino gehiagoko kosturik ez dutenak.
3. Iraunkortasun ekonomikoa eta finantzarioa bermatzen dituzten proposamenak.
4. Urnietan bizi diren herritar guztien interesa norberaren interesen gainetik jartzen duten proposamenak. 
5. Udalerriko auzoen arteko oreka bermatzen duten proposamenak.

Nork parte hartu dezake?

16 urte baino gehiago dituen Urnietan erroldatutako edozein pertsonak parte har dezake bi prozesuetan.

Noiz arte bidal daitezke proposamenak?

Proposamenak urriaren 16tik azaroaren 5 bitarte bidal daitezke.

Parte hartzeko bideak

• Formularioa herriko toki desberdinetan kokatutako kutxetan utziz: Bertan, Lekaio, Kiroldegia, Sarobe, Elkarteen Etxea, Egape ikastola (Lizardi eta Azkorte) eta Magale ikastetxea.
• Formularioa udalerriko hainbat tokitan jarrita dauden postontzietan utziz.
• Urriaren 27an eta 28an informazio karpan:

Urriaren 27an (ostirala): 10:00etatik 14:30era Etxeberri plazan.
17:00etatik 20:00etara San Joan plazan.
Urriaren 28an (larunbata) 10:00etatik 14:30era kiroldegiaren kanpoaldean.

Urriaren 27an photocall bat egongo da informazio karpan.

• Udaleko webgunean dagoen formulario digitala betez.
• Urnietako APP-aren bitartez.

Emaitzen jakinarazpena

Bestalde, emaitzen itzulketa egingo da. Informazio liburuxka bat sortuko da herritarrek eginiko proposamenetatik Udaleko teknikariek zeintzuk lehenetsi dituzten jakinarazteko eta 150.000 euroekin egingo diren hobekuntza guztiak komunikatzeko.

Aurreko urteetako parte hartze prozesuetan jendearen erantzuna oso ona izan da, eta oraingoan ere jendeak erantzutea espero du Udalak. Parte hartzera animatzen ditu herritarrak, haien beharrak ezagutu nahi ditu eta.

LH6-ko ikasleen partaidetza

Udalak partaidetzaren kultura errotu nahi du herritar guztien artean, baita 16 urtetik beherakoen artean ere. Horretarako, lanketa berezi bat burutu zen duela bi urte lehen aldiz prozesu orokorretik aparte Egapeko eta Magaleko LH6-ko ikasleekin. Aurreko urtean ere esperientzia oso aberasgarria izan zen eta aurten jarraipena emango zaio ekimen honi

Udalak aurrekontu irekien prozesura bideratutako 150.000 euroetatik gutxienez 15.000 erabiliko dira Urnietako Lehen Hezkuntzako seigarren mailako ikasleek egindako proposamenak gauzatzeko.

PARTE HARTU: AURKEZTU ZURE PROPOSAMENA