San Markos Mankomunitateak kanpaina berri bat jarri du abian, eta eskualdeko 1.400 ostalaritza-establezimendu baino gehiago bisitatzen hasi da (Donostia, Errenteria, Pasaia, Lezo, Astigarraga, Urnieta eta Lasarte-Oria) joan den astetik aurrera, plastikozko, metalezko eta brik motako ontzien hondakinak ostalaritzan birziklatzea sustatzeko, eta ostalariei lege-esparruak horri dagokionez ezartzen dituen betebeharren berri emateko.

San Markos Mankomunitateak azpimarratzen duenez, ostalariekin elkarlanean aritzea oso garrantzitsua da material horren gaikako bilketa tasak handitzen jarraitzeko, ostalaritza-sektorea ontzi arinen hondakin sortzaile garrantzitsua baita. Hori dela eta, birziklatze-helburuak lortzeko funtsezko sektorea da, sektorean ohitura jasangarriak ezartzeko edozein aurrerapenek klima-aldaketaren aurkako borroka nabarmen hobetzea baitakar.

Mankomunitatean ontzi arinen hondakinen gaikako bilketaren kopuru hori handitzea du helburu kanpainak, eta, hori aurrera eramateko, ostalaritza-sektorearen artean ontzi arinen birziklapenari buruzko ezagutza indartzeko landa-lan bat abiaraziko da, eta birziklatzeak gure ingurunean sortzen dituen ingurumen-onurei buruzko sentsibilizazioa sustatuko da.

San Marko Mankomunitatearen izenean aurkeztuko diren langile kualifikatuen bisitak joan den astean hasi ziren. Lehenengo fasean beharren azterketa bat egingo da, eta poster bat banatuko da establezimendu guztietan, baita eranskailu bat aurrerantzean bereizgarri gisa birziklatzeko konpromisoa hartzen dutenentzat. Bigarren bisita batean, ontzi arinen hondakinak birziklatzeko ontziak emango dira.

Bisita horietan, 30 minutuko online tailer batean izena emateko aukeraren berri emango zaie, bai euskaraz, bai gaztelaniaz. Bertan, birziklatzearen garrantziaz hitz egingo da eta sektorean sortzen diren zalantzak argituko dira. Era berean, lege-esparruak horri buruz ezartzen dituen betebeharrak landuko dira, eta, zehazkiago, 7/2022 Legea, hondakinaren ekoizlearen erantzukizunari eta bilketa bereizia indartzeari buruz hitz egiten dena, zeinaren nahitaezkotasuna eremu guztietara hedatzen baita, ez bakarrik etxeetara, baita zerbitzuen edo saltokien sektorera ere, kalitate handiko birziklatzea ahalbidetzeko eta kalitatezko bigarren mailako lehengaien erabilera sustatzeko.