Zaldundegiko eremuari behin betiko irtenbidea emateko lanak martxan dira. Hobekuntza honekin, Urnietako Udalak urrats berri bat emango du Urnieta gero eta herri atseginagoa eta irisgarriagoa izan dadin. Azken urteotan hainbat hobekuntza egin dira zentzu horretan, eta orain, beste pauso esanguratsu bat emango da, udalerriko arteria nagusietako bateko espaloiak nabarmen zabalduz. Gainera, udalerrian oinezkoen joan-etorri handiena duen puntuetako bat da.

Esku-hartzea amaitzen denean, Zaldundegi jatetxearen sarreraren bi aldeetan dauden espaloiek bi metroko zabalera izango dute, eta haurren aulkiekin doazen pertsonak eta mugikortasun urriko pertsonak arazorik gabe igaroko direla bermatuko da.

Egingo den obra garrantzitsua izango da, eta aurrekontua da horren erakusle, izan ere, 306.440 euroko kostua izango baitu.

Egungo funtzionamendua

Ibilgailuak puntu horretatik igarotzeari dagokionez, funtzionamendua orain arteko behin-behineko irtenbidearen berdina izango da. Hau da, semaforo bidez kontrolatutako ordezko pasabidea duen errei bakarra egongo da. Inguruko errepideetako norabideek ere eutsi egingo diete aldi baterako konponbidea ezartzean egin ziren aldaketei, epe horretan funtzionamendu egokia izan baitute.

Pasabidea obrak egin bitartean

Obra guztiekin gertatzen den bezala, baliteke eragozpenak sortzea lanak gauzatzen diren bitartean, baina Udala horiek ahalik eta txikienak izan daitezen saiatuko da eta gerta daitekeen edozein mugimenduren berri emango du.