Urnietako Energia Komunitatearen informazio bulegoa kiroldegian ireki zen, herritarrek ekimen horri buruzko edozein zalantza argitu ahal izateko edo urnietarrei komunitatera atxikitzeko eskaera osatzen laguntzeko.

Bulegoak martxoaren 30ean itxiko ditu ateak. Beraz, urnietarrak animatzen dira azken egun hauek aprobetxatzera eta bulegora gerturatzera. Bulegoa astearte, asteazken eta ostegunean egongo da irekita ondorengo ordutegian: 10:00-14:00 eta 16:00-20:00.

Urnieta jasangarriagoa

Udalerri jasangarriago bat sortzen laguntzeko 0 km-ko energia berriztagarria kontsumitzean oinarrituko den proiektua da Urnietako Energia Komunitatearena. Horretarako, plaka fotovoltaikoak jarriko dira udal eraikinetan, eta, beraz, herritarrek ez dute obrarik edo instalaziorik egin beharko euren etxe edo komertzioetan. Gainera, elektrizitateko fakturan %25erainoko murrizketa izango dute.

Ekimenari buruzko informazio guztia eskura dago Udalaren webgunean eta APP-an.