Atzo izandako ekaitzaren eta euriteen ondorioz, Egape ikastolak Azkorten duen eraikinaren atzeko horma erori zen. Erorketa horrek zentroko galdara-gelari eragin zion, baina Suhiltzaileen, Udaltzaingoaren, Ertzaintzaren eta Nortegasen esku-hartze azkarrari esker, egoera kontrolatzea lortu zen, gauzak gehiagora joan gabe.

Jorge Segurado Urnietako alkatea gertakarien lekura bertaratu zen, zuzeneko jarraipena egiteko. Amaia Amutsastegi ikastetxeko zuzendaria eta Amaia Urzelai Hezkuntza Saileko Gipuzkoako ordezkaria ere ikastolara hurbildu ziren. Era berean, Udalak Jokin Bildarratz Hezkuntza sailburuarekin ere hitz egin zuen gertaeraren bilakaeraz.

Zorionez, ez zen kalte pertsonalik izan, eta zentroak ateak ireki ahal izan ditu gaur goizean, bere jarduerarekin normaltasunez jarraitzeko. Orain, eroritako lurrak eta harriak garbitu beharko dira. Urnietako Udalak egingo du lan hori, eta Hezkuntza Saila arduratuko da ikastetxeko zerbitzu guztiak berrezartzeaz.

Udalak eskertu nahi du eragile desberdinek egindako lana, bai eta gertakarien lekura hurbildu ziren pertsonek erakutsitako interesa, inplikazioa eta lankidetza ere.