Herriko nerabeen kezkak, beharrak eta proposamenak jasotzeko eta udal-kudeaketan barneratzeko asmoz, Udalak lanketa berezi bat burutu du beste behin Egapeko eta Magaleko LH6ko ikasleekin aurrekontu irekien partaidetza prozesuaren barruan. 

Urte amaieran zuzeneko saioak egin zituzten ikasleekin Jorge Segurado alkateak eta Agurtzane Mercader zinegotziak, eta, ondoren, proposamenak landu zituzten euren ikastetxeetan lanketa bikain bat eginez.

Hirigintza saileko teknikariek aztertu dituzte ikasleengandik jasotako proposamenak eta prozesu honen barruan skate park ondoan apurtuta dagoen baranda zatia jartzea eta txakur parkeko atea konpontzea erabaki dute. 

Ikasleek egindako beste proposamen batzuk prozesu orokorraren edo aurrekontuko beste partida batzuen bidez aurrera eramango dira. Hala nola, Plazido Muxika plazako uraren kalitatea aztertu, kalistenia parkea egin, kiroldegiko futbol ateen atzean sareak jarri, Teresa Amuategi parkea estali, kiroldegian apurtuta dagoen kristala konpondu, Geltoki kaleko argiteria hobetu, futbol zelaia hobetu eta kirol gunea egin Etxeberri parkean.

Gainerako ekarpenak kontuan izango dira etorkizunera begira.