Urnietako Udalak otsailaren 26an egindako udalbatzarrean aho batez onartu zen martxoaren 8ko Adierazpen Instituzionala, Emakumeen Nazioarteko Eguna.

Irurain gainean segurtasuna hobetzeko EH Bilduk aurkeztutako mozioa berriz, puntuka bozkatu zen. Lehenengoak Gipuzkoako Foru Aldundiari, GI-3722 errepidearen jabeari, eskatzen zion Iruraingo ibilbidean urgentziazko esku-hartze bat egiteko, bizikleten erabiltzaileen eta oinezkoen segurtasuna bermatzeko, eta aho batez onartu zen. Erabakia Aldundiari helaraztea ere bai.

Gipuzkoako Foru Aldundiak Plazaolako bide berdea Iruraingo biribilgunetik igarotzeko modurik seguruena eta eraginkorrena aztertzeko eskaera, ordea, ez zuten babestu EAJk eta PSE-EEk. Aldundiak duela gutxi jarri du jendaurrean puntu horretatik igarotzen den proiektua, eta Udalak dagoeneko aurkeztu ditu alegazioak, proiektuan planteatutako bideak egokiak ez direla iritzita. Alegazio horiei emandako erantzunen arabera erabakiko da nola jokatu. Gauza bera gertatu zen Ergoien poligonoan bizikleta eta oinezkoentzako bide bereizi bat sortzeko eskaera Udalari luzatzeko mozioaren proposamenarekin.

Bestalde, utzarazpen administratiboaren behin betiko onarpena EAJren eta PSE-EEren bozkekin egin zen. EH Bilduk kontra bozkatu zuen.