2026·01·30
Bizi itxaropenaren igoeraren eta beste mota bateko zenbait faktoreen ondorioz, zaintzaren gaiak gero eta garrantzi handiago du gaur egungo gizartean.
Bada, zaintza estrategien gaineko espazio bat antolatu dute emakumeentzat Urnietako Bagara Talde Feministak eta Setem-ek asteburu honetarako.
Nola zaindu nahi dugu geure burua —eta nola izan zainduak— bizitzako atal ezberdinetan?
Zaintzak birpentsatzeko eta elkarrekin hausnartzeko gune batera gonbidatzen dituzte interesa duten emakumeak: eguneroko bizitzatik, komunitatetik, eta etxebizitza kolaboratiboa bezalako alternatiba errealetatik abiatuta.
Tailerra bi zatitan banatuta egongo da. Urtarrilaren 30ean arlo teorikoa landuko da eta oinarri horren gainean alor praktikoa urtarrilaren 31n.
Irati Mogollón soziologoa izango da tailerraren dinamizatzailea eta honako arloetan dago espezializatua: adineko pertsonen ahalduntze feminista, ekonomia feminista eta etxebizitza kolaboratiboko prozesuak.
Edukia
Guztioi eragiten diguten galderetatik abiatuko dira tailerrean: Baditugu gure inguruan zaintza eskaintzen duten espazioak? Nola zaindu geure burua eta nola izan zainduak bizitzako atal ezberdinetan? Nola mantendu bizitza komunitatean nekatuta amaitu gabe? Zaintzea… eta nahi ez badut? eta ezin badut? Nork zainduko nau ni, nik ezin dudanean?
Etxebizitza kolaboratiboen adibideak eta bizikidetza-ereduak oinarri hartuta, eztabaidak eta gakoak irekiko dira: zaintzak nola antolatzen diren berriro pentsatzeko eta duintasunez, babesarekin eta autonomiaz bizitzeko alternatibak irudikatzeko.
Tailerra
Tailerra Urnietako kiroldegiko erabilera anitzeko gelan garatuko da.
- Urtarrilak 30, 18:00: Beste zaintza eredu batzuk ezagutzea
- Urtarrilak 31, 9:00-11:00: Eta nik, zer nahi eta behar dut?
- Urtarrilak 31, 11:00-13:00: Urnietan, zer egin?
Izen-ematea
Izen-emateak zabalik jarraitzen du interesa duten emakumeentzat eta online egin daiteke esteka honetan.
