Urnietan punta-puntako hiru sagardotegi ditugu, gure eskaintza gastronomikoaren erreferente direnak. Horiek bultzatzeko, bertako produktuak sustatzeko eta herriko ondare kultural eta gastronomikoari balioa emateko, Urnietako Udalak sagardo denboraldiaren hasiera ekitaldia egingo du, herriko sagardotegiekin eta Euskal Sagardoarekin elkarlanean.

Herriko elkarte gastronomikoak protagonista

Aurtengo ekitaldia Eula sagardotegian egingo da urtarrilaren 16an eta hortik aurrera eta apirilaren amaierara arte sagardotegi denboraldia garatuko da. Beraz, sagardotegiak azken xehetasunak fintzen ari dira, hasiera modurik egokienean emateko eta ahalik eta zerbitzurik onena eskaintzeko.

Aurtengo lehenengo “txotx”-a herriko lau elkarte gastronomikoetako ordezkariek egingo dute eta sarrera gonbidapen bidez izango da.