Euskal kultura eta euskara bultzatzea dira Urnietako Udalaren helburu estrategikoetako bi.

Helburu horiekin eta, zehazki, euskara bultzatzearekin bat, aurten euskararekin lotutako partidak %5 baino gehiago handitu dira aurreko urteko aurrekontuarekin alderatuta. Esparru honen barruan, eta aurreko urteetako ildoari jarraituz, Udalak 2024ko ekitaldian Erroitz S.L., Aiurri astekariaren editorea, ekonomikoki laguntzen jarraitzen du. Ezaguna denez, Aiurrik herriko gertakarien berri ematen du eta euskara hutsean argitaratzen da, gure hizkuntzaren erabilera zabaldu eta sustatzeko.

Udalak 26.000 euroko dirulaguntza zuzena emango dio 2024an Erroitz S.L.ri, eta publizitatean beste 4.000 euro bideratzeko konpromisoa hartu du, orotara 30.000 euro osatuz.

Urnietako alkate Jorge Seguradok eta Aiurriko zuzendari Jon Ander Ubedak sinatutako hitzarmena 2024ko abenduaren 31ra arte egongo da indarrean.