Urnietako Udaleko Gobernu Taldea, EAJ-PNV eta PSE-EE udal taldeek osatua, legegintzaldiaren erdialdera iritsi da eta egindako lanaren balorazioa oso positiboa da.

Udalak gobernu sendo eta egonkorra du, bi taldeen arteko sintonia onari esker. Talde lan hori proiektu estrategikoen garapenarekin eta egikaritzearekin islatzen ari da, Urnieta garatuz eta herritarrei eskaintzen zaizkien zerbitzuak hobetuz.

Obra garrantzitsuak

Hirigintzari dagokionez, aldaketa nabarmena gertatzen ari da. Duela gutxi, Lasarte-Oriarako errepide berria ireki da, Zabaleta auzoak jasaten zuen trafiko handia arintzeko. Azken hilabeteetan, halaber, Berrasoetako bainu publikoa jarri da, eta Postagaingo eta Egapeko parkea berritu dira.

Gainera, Arantzubiko aldapan arrapala mekanikoak jartzeko eta Idiazabal kaleko bulebarizazioaren bigarren faseari ekiteko proiektuak eta pleguak onartu dira. Oraingo honetan, Zaldundegitik Arantzubiraino doan tartean esku hartuko da. Eta aurten ere Teresa Amuategi parkea estaltzen hasiko da, haurrek euri-egunetan jolasteko gune bat izan dezaten.

Legegintzaldiaren hasieran amaitu zen Plazido Muxika plaza estaltzea, herri-kontsulta baten ondorioz, eta Elkarteen Etxea inauguratu zen. Gune moderno eta funtzional bat ahalbidetu zen, gizarte-politiketako hainbat zerbitzu hartzen dituena eta tokiko hainbat elkarteren egoitzak biltzen dituena.

Herritarrek eskatutako pump track eta skate park pistak ere errealitate bihurtu dira, kiroldegiaren kanpoaldean jarritako ping-pong eta teqball mahaiekin batera, aisialdirako eskaintza handitzen dutenak.

Bestalde, gogoratu behar da Aldundiak urte amaieran aurkeztu zuela Urnieta eta Lasarte-Oria lotuko dituen bidegorriaren eraikuntza, mugikortasun jasangarria bultzatzeko eta bi udalerrien arteko lotura hobetzeko. Proiektua aste honetan bertan onartu da eta laster lizitatuko da.

Jasangarritasuna

Gobernu Taldearen helburu nagusietako bat Urnieta udalerri jasangarria izatea da, eta energia garbi eta berdeen aldeko apustu irmoa egiten ari da. Udalerriko kanpoko argiteria guztia LED sistemara aldatu da, eta horrek energia-kontsumoa %70 murriztuko du gutxi gorabehera. Gauza bera egin zen eskubaloiko pista zaharrean, eta lanean ari da futbol zelaian eta udal pilotalekuan egiteko.

Urnietako energia-komunitatea martxan jartzea, ibilgailu elektrikoentzako kargagailuak ipintzea eta gaur egun ibilgailu hibridoak dituzten Udaltzaingoaren bi autoak berritzeak ere helburu hori argi uzten dute.

Era berean, birziklapenaren arloan beste urrats bat eman nahi da, gaikako bilketaren tasa hobetzeko, %69 ingurukoa baita. Horretarako, kanpaina bat egin zen udalerriko etxe guztietara gida zabal bat bidaliz, kaiolak jarri dira tamaina handiko hondakinak modu ordenatuan uzteko beste zazpi uhartetan, eta edukiontzi txikiak jarri dira hilerrian, espazio horretan ere hondakinak behar bezala sailkatzeko.

Gizarte zerbitzuak

Arlo sozialean bi proiektu nabarmentzen dira. Alde batetik, nolabaiteko mendekotasuna duten pertsonei laguntzeko iraupen luzeko pisuak martxan jartzea. Zerbitzuak sei apartamentu ditu, Errekalde kalean, eta azken xehetasunetaraino zaindu dira.

Eta bestetik, Urnietako zainketen ekosistema berria osatzeko egiten ari den lana. Elkarlaneko eta partekatutako azterlan zorrotz bat egin zen, urnietarrek parte hartu zutena, eta duela gutxi lehen zainketa mahaia eratu da.

Elkarte-ehuna

Urnietako elkarteak eta eragileak dira udalerriko kultur eta aisialdi eskaintzaren eragile nagusiak. Egiten duten lan bikainari esker, udalerriko dinamika kultural eta soziala bizirik mantentzen da, eta egiten duten ekarpen hori guztia balioetsi, babestu eta bultzatzen jarraitzeko asmoz, 30 elkarte ingururekin sinatutako lankidetza hitzarmenak berritu dira.

Hezkuntza

Hezkuntza arloan hastear dago Egapeko DBHko eraikin berria eraikitzeko obra. Ikastetxe berriarekin, ikastolak gune moderno bat izango du, ikasleen eta irakasleen beharrei erantzungo diena, kalitatezko hezkuntza bermatuz. Gainera, Udalak joan den udan amaitu zuen DBHko zentro berriaren ondoan kokatuko den parke inklusiboaren lehen fasea. Hurrengo bi faseak eraikin berriaren eraikuntzarekin batera garatuko dira.

Etxebizitza

Etxebizitza ere gai garrantzitsu bat da Gobernu Taldearentzat. HAPOn ezarritako etxebizitza-eremuak garatzea funtsezkoa da Urnietako gazteek beren bizi-proiektua herrian jarraitzeko aukera izan dezaten. Helburu horrekin, HAPO Hiri Antolamenduko Plan Orokorra aldatzen ari da. Aldaketarekin etxebizitza berrien eta industrialdeen garapena erraztu eta arindu nahi da. Lana burututa, Eusko Jaurlaritzaren oniritziaren zain gaude aldaketa egiteko.

Etxebizitzen hirigintza-garapenei dagokienez, AIU32 babiloniako eremuak urrats garrantzitsua eman zuen Ekintza Urbanizatzaileko Programa onartu zenean. Hurrengo mugarriak Birpartzelazio Proiektua eta Urbanizazio Proiektua izango dira. Dokumentu horiek oso aurreratuta daude. Gogoratu eremu horretan 340 etxebizitza eraikiko direla, eta horietatik %75 babes ofizialekoak eta tasatuak izango direla.

Partaidetza

Gobernu Taldeak erabaki publikoak hartzeko prozesuan herritarrak inplikatzen, ahalduntzen eta partaide egiten jarraitu nahi du. Helburu horrekin, legealdi honetako aurrekontu irekien partaidetza-prozesuak berritasun garrantzitsu batekin garatzen ari dira; izan ere, proposamenak egiteaz gain, Urnietako bizilagunak erabakitzen ari dira prozesu horietara bideratutako 150.000 euroen bidez zer proiektu gauzatu.

Era berean, Urnietako gazteen aisialdiko beharrak ezagutzeko prozesua hasi du Udalak. Herriko gazte talde batek beraiek kudeatutako lokal bat izateko eskaerari erantzunez, Udalak beraien beharrak aztertuko ditu ahalik eta parte-hartze prozesu zabalena eginez. Diagnostikoaren emaitzek aisialdi-eskaintza hobetzen saiatzeko neurriak jasoko dituzte.

Eremu gehiago

Hilabete hauetan beste arlo batzuetan ere aurrera egin da. Adibidez, berdintasunaren esparrua are gehiago bultzatzen saiatuko gara. Horretarako, berdintasun eta zeharkako gaien teknikariaren jardunaldia luzatu da. Kulturan 0-6 urteko haurren artean irakurzaletasuna sustatzeko apustua egin da, eta programak oso harrera ona izan du.

Merkataritzan eta turismoan, bigarren urtez jarraian ireki da sagardo denboraldia Urnietan, sagardotegiak eta bertako produktuak sustatzeko. Halaber, lurralde-irismena duten hedabideetan kanpainak eta publizitate-txertaketak egiten ari da, Urnieta ezagutarazteko eta gure inguruko familia-turismoa erakartzen saiatzeko. Gehienbat euskaraz lan egiten duten hedabideetan egitearen alde egin da, gure hizkuntza sustatzen saiatzeko. Zentzu horretan ere ahalegin handia egin da Euskaraldiarekin, eta egiten jarraituko da egunerokotasunean euskararen erabilera areagotzen saiatzeko.

Herrira bizi-proiektu bat garatzeko asmoz etortzen den jendearentzat, aldiz, ongietorri-saioak antolatzen jarraitzen da, ahalik eta azkarren eta modurik onenean integra daitezen.

Era berean, gure ondarea kontserbatzeko eta balioztatzeko hainbat lan egin dira, zehazki, Altzibar eta Tximistako elurzuloak, Montefrio eta Berrasoetako karobiak, tokiko ondare megalitikoa eta abar.

Eta kirolari dagokionez, kirol-galak berreskuratu dira, gure kirolariek egiten duten lan handia eta lortzen dituzten emaitza bikainak aitortzeko.

Bide erdia burututa, Gobernu Taldeak konpromiso eta ilusio berarekin jarraituko du lanean, legegintzaldiko plana garatzeko eta ezarritako helburuak betetzen saiatzeko.