Urnietako Udalak bere kanpoko argiteria guztia LED sistemara modernizatu zuen 2024. urtea eta 2025. urtearen hasiera bitartean, 1.000 argi inguru aldatuz. Anbizio handiko proiektu hau bi helbururekin sortu zen: eraginkortasun energetikoa sustatzea eta herrian argi-kutsadurari aurre egitea.

Benetako konparazioa aurtengo datuak lortu ondoren egin ahal izango da, baina aldaketaren aurreko 2023. urteko eta 2025. urteko datuak erkatuta, hobekuntza handia izan dela ikus daiteke. Energia-kontsumoa %46,07 murriztu da, eta horrek %56,36ko aurrezpen ekonomikoa ekarri du.

Azpiegitura jasangarrien hedapen horrekin, Urnietak beste pauso bat eman du hiri-eredu berdeago, eraginkorrago eta ingurumenarekiko begirunetsuago baterantz.