Ongi etorri Urnietara!

Urnieta Gipuzkoako ipar-ekialdean dagoen udalerria da. Donostialdea eta Buruntzalde eskualdeetakoa da. Donostiatik 12 kilometrora kokatua dago. 22,4 km2-ko azalera du eta 6. 210 biztanle ditu.

Mugakide Hernani iparraldean eta ipar-ekialdean, Lasarte-Oria ipar-mendebaldean, Andoain mendebaldean eta hego-mendebaldean, eta Elduain hegoaldean ditu.

Urnieta oso ondo komunikatua dago, Lisboa – Madril – Paris europar ardatzaren ondoan eta Kantauri itsasoa Mediterraneoarekin lotzen duen bidearen ondoan (Bilbo – Donostia – Iruñea – Zaragoza – Bartzelona); horrez gain, 100 km-ko erradioan gutxi gorabehera, bost aireportu daude: Loiu (Bilbo), Foronda (Gasteiz), Noain (Iruñea), Hondarribia (Donostia) eta Biarritz.

Urnietako herria mendiz inguratua dago, eta horietatik esanguratsuena Adarra mendia da, 819 metro garaikoa eta inguruko mendizaleek maiz bisitatzen dutena. Era berean, Adarra mendi tontorretik begiratuta inguruko herriak (Hernani, Donostia, Arano…) eta Kantauri itsasoa ikus daitezke. Gailurraren inguru gertuan eta inguruko mendietan hainbat harrespilen (Elurzulo, Mulisko gaina…) eta trikuharrien (Otsolepo, Pozontarriko lepoa…) aztarnak daude. Denak Adarrako estazio megalitikoa deritzonaren baitan, Kultura Ondare gisa Monumentu Multzo izendatuak.

> Urnieta ezagutu

Gure ondarea

Urnieta herria nahiz herri txiki bat izan, ondare aberatsekoa da. Hori dela eta, ondare zerrenda baten jabe da, geoUrnieta sistema geografikoaren bidez ikus daitekeena

Tresna horren bidez herrian Done Jakue bidea egiteko bide-seinaleak ditugu, aztarna arkeologikoak (kobazuloak, burdinola, labeak), izendapen historikoko eraikuntzak (baserriak, udaletxea, eliza, ermita, errota…), natur-ondareak (akuiferoak), aztarna historikoak (saroiak) eta estazio megalitikoak (harrespilak eta trikuharriak).

Hori guztia froga dezazuen, geoUrnieta aplikaziora sartzera gonbidatzen zaituztegu.

geoUrnieta