Angelo Jimenezen “Zaintzailea” eskultura inauguratu da Zaldundegi plazan, Urnietako Eskultura Lehiaketako lan garailea, hain zuzen. Lehiaketaren gaia “Emakumeei aitortza zaintzen eremuan egindako lanarengatik” zen, izan ere, historian zehar lan hori ikusezin bihurtua eta gutxietsia izan baita.

2022an gauzatu zen lehiaketak 3 fase izan zituen. Lehenengoan, 18 urtetik gorako interesdun guztiek beren obra aurkezteko aukera izan zuten, oinarrietan ezarritako irizpideak betez. Ondoren, lehiaketako epaimahaiak hiru lan aukeratu zituen, eta azkenik, 14 urtetik gorako urnietarrek euren gustukoenaren alde bozkatzeko aukera izan zuten.

Herritarrek hautatua

Angelo Jimenezen “Zaintzailea” eskulturak jaso zuen bozka gehien herri bozketan, eta, beraz, bere lana izan zen Eskultura Lehiaketako irabazlea. Guztira 180 urnietarrek parte hartu zuten, eta Jimenezen eskulturak botoen %72 jaso zuen (130).

Lehen edizioko eskultura irabazlea honetan datza: estilo primitibistako obra da, forma leunak eta femeninoak nabarmentzen dira. Konposizioaren harmonia, non emakumea obraren protagonista bezala nabarmentzen den (zaintzailea), tente eta indartsu agertzen da, non bi pertsonaren zaintzari bide ematen dion. Horietako batek hauskortasuna eta zahartzaroa adierazten ditu, egoera makur eta errazean; eskuinean, berriz, adin txikiko pertsona bat irudikatzen da. Biak berak zaintzen ditu (zaintzaileak). Obra zizelkatuta eta poliestireno hedatuko blokez hustuta dago. Grabitatearen bidez aluminioan urtuta dago, harea-moldean.

Obraren ezaugarriei dagokionez, gutxi gorabeherako pisua 120 kilokoa da, eta altueran 162 zentimetro, luzeran 99,5 zentimetro eta zabaleran 60 zentimetro neurtzen ditu.

Jimenez Usurbilen jaioa da, baina azken 15 urteak Urnietan bizitzen daramatza. Herrian bizi denetik darama harriak eta materia desberdinak lantzen. Hernanin ikasi zituen harria lantzeko teknikak, eta ordutik, bere kabuz ikasi du beste materialak nola landu; adibidez, burdina. Besteak beste, hiru erakusketa antolatu ditu aurrez: Biteri kultur etxean (Hernani), Lekaio kultur etxean (Urnieta) eta Betharram aretoan (Azpeitia).