Alcobendas eskubaloi taldeak bigarren urtez jarraian egin du udako campusa Urnietan.

Bigarren mailan dagoen talde madrildarra oso pozik dago udalerriarekin, bai kirol instalazioengatik, bai herriagatik eta bertako jendeagatik, baita inguruagatik ere, Angel Castaño campuseko koordinatzaileak kontatu digunez. Emozioz eta pasioz hitz egiten du campusaz.

Zer balorazio egiten duzue bigarren esperientzia horri buruz?

Oso ona. Herriaren, kiroldegiko arduradunen eta salestarren aldetik izan dugun tratua bikaina izan da. Lehenengo txandan 120 parte hartzaile izan genituen eta egunero entrenatzeko aukera izatea, talde guztiekin eta behar duzun aldi guztietan gozamena da. Urnietako mailako ondo hornitutako bi kirol pista luxu bat dira. Gainera, ondoan igerileku bat izatea, ostatutik oinez iritsi ahal izatea... Ez dago horrelako lekurik. Oso leku atsegina da eta tenperatura baxuagoa da.

Nola iritsi da Madrilgo talde bat Urnietara?

Kasualitatea izan zen. Guk campus bat egin nahi genuen hondartzatik gertu, teknifikazio entrenamenduak eta udako aisialdia uztartuz. Proiektu hori Guardamar de Seguran jarri genuen martxan 2015ean. 5 urte eman genituen han, eta gero etorri zen covid -a. Denbora horretan ez genuen campusik izan, baina bai teknifikazio jarduera Alcobendasen, gure instalazioetan. Gero, ideia horri heldu nahi genion berriro, baina ezin genuen Guardamarren gauzatu, eta beste leku batzuk bilatzen hasi ginen. Klubeko zuzendarietako batek Urnietako Salestarretan ikasi zuen. Ezagutzen zuen jendearekin harremanetan jarri zen eta baietza eman ziguten. Urnietako Udalarekin ere harremanetan jarri ginen, aurrera egiteko esan ziguten, eta horrela sortu zen aukera. Joan den udan denak hain ondo funtzionatu zuenez aurten errepikatu egin dugu. Orain campusaren egoitza berria Urnieta da eta espero dezagun denbora luzez izatea.

Zer aurkitzen dute parte hartzen duten neska-mutilek?

Teknifikazio altuko entrenamenduak egiten ditugu, aisialdiarekin eta denbora librearekin uztartuta. Udan kirola egiten jarraitzera gonbidatzen ditugu eta kirol jardueraz gain, era guztietako tailerrak egiten ditugu: indarra, elikadura, komunikazioa, lehen laguntzak, jolas kooperatiboak... Neska-mutilek primeran pasatzen dute.

Campusak oso harrera ona du.

Guretzat ikaragarria da, lehen txandan parte-hartzaileen errekorra izan genuelako, 120. 100 parte-hartzaile barrukoak izan ziren, eta beste 20 Urnieta, Andoain, Usurbil… ingurukoak. Azken horiek gaua etxean pasatzen zuten, baina campuseko jarduera guztia egiten zuten. Jendea kanpoan geratzen da itxaron zerrendan, eta sare sozialetan ez dugu publizitate handirik egiten. Campuseko markaren atzean ere ez dugu kirolari handirik, baina oso ondo funtzionatzen du, Alcobendasko akademiak ematen dion bermea daukagu.

Zenbat denbora egon zarete Urnietan?

Bi aste, uztailaren 10etik 23ra. 9 urtetik 17 urtera bitarteko neska-mutilek parte hartu dute.

Eta zein da funtzionamendua? Adinaren arabera banatzen dira?

Campuseko kirol-jarduera adinera eta mailara egokitzen dugu. Lehen entrenamendu batzuk egiten ditugu entrenatzaileek analisi orokor bat egin dezaten. Horretan oinarrituta antolatzen gara eta taldeak aldatzen ditugu, behar izanez gero. Egia da astebetean ez dizula gauza sakonak egiteko denborarik ematen, baina hazitxo bat jartzea gustatzen zaigu. Entrenatzen duguna baino gehiago entrenatzeko modua da. Hobeto egoteko balioko dieten entrenamendu ohiturak barneratzea gustatzen zaigu. Etorkizunean lagungarri izan dakizkiekeen tresnak ematen saiatzen gara.

Giro ona nabari zen, kalean kantari entzuten zitzaizuen.

Staff tekniko zoragarri bat dugu eta funtzionamendua primerakoa izaten da, niretzat oso zirraragarria da. Pozik eta zoriontsu ikusten ditugu neska-mutilak, eta horrek asko betetzen gaitu. Jasotzen dugun feedbacka oso ona da eta horrek asebete egiten gaitu. 18 entrenatzailerekin etorri ginen, ahalik eta arretarik onena eskaintzeko eta dena ondo kontrolatuta edukitzeko.

Zuen kluba Madrilgoa da, baina campusean Estatu osoko neska-mutilek hartzen dute parte.

Leongo, Alacanteko, Bartzelonako, Euskal Herriko... jendea etortzen da. Euren artean oso giro berezia sortzen da eta agurraren eguna gogorra izaten da, hemendik benetako lagunak eramaten dituztelako.

Herria eta ingurunea ezagutzeko aukera ematen dizue?

Bi irteera egiten ditugu hondartzara, Donostiara eta Oriora. Gainera, beste ekintza bat herrian zehar ibilaldi bat egitea izaten da, Urnieta ezagutzeko. Baina egia da ez dugula astirik askoz gehiago ezagutzeko, jarduera asko baititugu.

Nolako harrera izan duzue herrian?

Jendea oso atsegina da hemen. Lehen aipatu duzun bezala, herrian zehar abesten joaten ginen, eta nik uste dut jendeak ezagutzen gintuela. Batzuk nongoak ginen eta zer egiten genuen galdetzera hurbiltzen zitzaizkigun. Ondo hartzen gaituzte. Giro ona transmititu egiten da. Niri gustatuko litzaidake campusean gertatzen denaren eta herriaren arteko komunio hori pixkanaka irekitzen joatea eta hemengo jendearekin batera jardueraren bat egin ahal izatea.

Beraz, Urnietara etortzen jarraitzeko asmoa duzue.

Urtetik urtera hobea da, eta nik uste dut baietz. Pentsatu nahi genuke campusak jarraipena izango duela hemen. Gu gustura gaude eta Urnietako jendea ere hala badago etortzen jarraituko dugu. Gainera, hirugarren txanda bat egitea pentsatzen ari gara, dagoen eskaria dela eta.